Euver de Nach

In 1999 haet eine klein gruupke Venlonaere ut initiatief genaome ein jaorliks truukkómmend dialekfestival te organisaere. Doel waas en is ein breid publiek in aanraking laote kómme met streektaalmeziék en 't Limburgse dialek. Dit doel wuurt nog altiéd naogestreef en weej wille muziekante, teksdichters en componisten bliéve stimulaere zich bezig te halde met ut Limburgse Leed. De stichting wilt de Limburgse dialect meziek versterke en vernieje door creatieve projecte te initiëre en te óndersteune.

In de aafgelaupe jaore zien d'r al mièr dan 150 verschillende artieste en bands geboek in alle soorte en maote. Beej 't boeke van artieste probeert de Nach altied nièje artieste ein plek te gaeve. Auk bestaeje we aandach aan de combinatie tösse arties en locatie. Heejbeej probeert de Nach de geijkte combinaties te vermiede zoeëdet 't vaste keffeepubliek iets bizónders te zeen krieg. Teruukkómmende artieste staon zoeë vuuël meugelik op wissellende locaties.